ރައީސް ނަޝީދުގެ ޒިންމާދާރުކަން ކުޑަ އިންޑިއާ ކޮޅަށް ޖެހިފައިވާ ގޮވާލެއްވުން!

ކުރީގެ ރައީސް މުޙައްމަދު ނަޝީދު އިޖުތިމާޢީ މީޑިއާގައި އިއްޔެ ކުރެއްވި ޕޯސްޓެއްގައި ބައިނަލްއަޤްވާމީ މަޝްވަރާތަކުގައި، ރާއްޖޭގެ ކަނޑުގެ ސަރަޙައްދު ބެލެހެއްޓުމަށްޓަކައި ބޭރުގެ ބާރުތަކާއި އިންޑިއާގެ އަސްކަރީ އެހީތެރިކަމަށް އެދިވަޑައިގެން ދެއްކެވި ވާހަކަފުޅަކީ ޤައުމީ މަޞްލަޙަތަށް ބެލުމެއްނެތި ދެއްކެވި ވަރަށް ޒިންމާދާރުކަން ކުޑަ، އަދި ވަކިކޮޅަކަށް ޖެހިފައިވާ ވާހަކަފުޅެކެވެ. ދިވެހިރާއްޖޭގެ ސަރަޙައްދީ ރައްކާތެރިކަން ކަށަވަރުކުރުމުގެ ފުރިހަމަ ޤާބިލުކަން ދިވެހި ދައުލަތާއި އެމްއެންޑީއެފްގެ ކޯސްޓްގާޑުގައި ނެތް ކަމަށް ދޭހަވާ މޭރުމުން ދެއްކެވި މި ވާހަކަފުޅަށް، ދިވެހި ސަރުކާރުން ވަނީ ފަސްޖެހުމެއްނެތި ވަރުގަދަ، ޙައްޤު ރައްދެއް ދީފައެވެ. ދިވެހިރާއްޖޭގެ މިނިވަންކަމާއި، ސިޔާދަތާއި، ކަނޑުގެ ސަރަޙައްދީ ރައްކާތެރިކަމަކީ އެއްވެސް ޝަރުޠަކާ ނުލައި، ކޮންމެ ދިވެހި ރައްޔިތަކާއި ދައުލަތުން އެންމެ މަތީ ދަރަޖައިގައި ޙިމާޔަތްކުރަންޖެހޭ އަސާސީ ޤައުމީ އަމާނާތެކެވެ. ދިވެހި ދައުލަތުގެ ޙަޟާރާތީ ތާރީޚަށް ބަލާއިރު، ދިވެހިން އަބަދުވެސް ފަޚުރުވެރިވަނީ އަމިއްލަ ފަސްގަނޑާއި، އަމިއްލަ ކަނޑުތަކުގެ ސިޔާދަތީ އިޚްތިޔާރު އެހެން އެއްވެސް ބޭރުގެ ބާރަކަށް ދޫނުކޮށް، އަމިއްލަ އިސްތިޤްލާލު ދެމެހެއްޓުމުގައި ދިވެހިން ދައްކާފައިވާ ސާބިތުކަމަށެވެ.

ކަނޑުގެ ސަރަޙައްދު ބެލެހެއްޓުމުގެ ފުރިހަމަ ބާރު އޮތީ ދިވެހި ދައުލަތަށް

ރައީސް ނަޝީދުގެ ވާހަކަފުޅާ ގުޅިގެން ރައީސް އޮފީހުން ނެރުއްވި ބަޔާނުގައި ސަރުކާރުން ވަނީ ދިވެހިރާއްޖޭގެ ސަރަޙައްދާއި ދައުލަތުގެ ސިޔާދަތަކީ އެމައްޗަށް ދިވެހިރާއްޖޭގެ މިނިވަންކަން ބަރޯސާވާ، ބަދަލުނުކުރެވޭނޭ ދިވެހި ދައުލަތާއި ރައްޔިތުންގެ ޙައްޤެއްކަން ސާފުކޮށް ހާމަކޮށްފައެވެ. ރާއްޖޭގެ ސަރަޙައްދުގައި ހިމެނޭ ބައިނަލްއަޤްވާމީ ވިޔަފާރީގެ ކަނޑުއޮޅިތަކާއި، ޚާއްޞަ

އިޤްތިޞާދީ ސަރަޙައްދު މި ޤާނޫނީ ހުދޫދުގެ ތެރެއިން ބަލަހައްޓައި، މިނިވަންކަމާއި ސިޔާދަތު ރައްކާތެރިކުރުމަކީ ދިވެހި ތާރީޚު ހެކިދޭ ފަދައިން ދިވެހިން އަބަދުވެސް ވަރަށް ފަޚުރުވެރިކަމާއެކު ކޮށްފައިވާ، އަދި މިހާރުވެސް ކުރަމުންގެންދާ މުހިންމު ޤައުމީ

ވާޖިބެކެވެ. ސަރުކާރުން ވަނީ ރާއްޖޭގެ ސަރަޙައްދީ ބާރުތައް ބޭރުގެ އެއްވެސް އަސްކަރިއްޔާއަކަށް ނުވަތަ ބޭރުގެ ފަރާތަކަށް ދޫނުކުރާނެ ކަމުގެ ފުރިހަމަ ޔަޤީންކަން ދީ، ދިވެހި ސިފައިންގެ ޤާބިލުކަމާމެދު ދިވެހި ރައްޔިތުންގެ ހިތްތަކުގައި ޝައްކު އުފެދޭ ގޮތަށް ދެވޭ ކޮންމެ މެސެޖެއް ހަރުކަށި އިބާރާތުން ކުށްވެރިކޮށްފައެވެ.

އިސްތިރާޖީ ކަނޑުއޮޅިތަކާއި ދިވެހިރާއްޖޭގެ ޒަމާންވީ ޚިދުމަތް

ދުނިޔޭގެ ޖިއޮގްރަފީއަށް ބަލާއިރު، ދިވެހިރާއްޖެ އޮތީ އިންޑިއާ ކަނޑުގެ އިސްތިރާޖީ ގޮތުން އެންމެ މުހިންމު ބައިނަލްއަޤްވާމީ ކަނޑުގެ މަގުތައް ހުރަސްކުރާ ސަރަޙައްދުގައެވެ. ރާއްޖޭގެ ސަރަޙައްދުގައިވާ ކަނޑުއޮޅިތަކަކީ ދުނިޔޭގެ ތެލުގެ ވިޔަފާރިއާއި އާންމު ވިޔަފާރީގެ ބޮޑު އިންސައްތައެއް، އެއް ބައްރުން އަނެއް ބައްރަށް ދަތުރުކުރުމަށް ބޭނުންކުރާ މުހިންމު މަގުތަކެކެވެ. މި ސަރަޙައްދު އަމާންކަމާއެކު ބޭނުންކުރުމުގެ މަގު ފަހިކޮށްދިނުމަކީ ބައިނަލްއަޤްވާމީ ވިޔަފާރިއަށާއި، މި ސަރަޙައްދުގެ ހަމަޖެހުމާއި ސަލާމަތަށް ދިވެހިރާއްޖެއިން ޒަމާނުއްސުރެ އަމިއްލަ ސިޔާދަތީ ބާރުގެ ތެރެއިން ވެދެމުން އަންނަ އަގުހުރި ޚިދުމަތެއްކަމުގައި ސަރުކާރުގެ ބަޔާނުގައިވެއެވެ.

އެހެންކަމުން، ރާއްޖޭގެ ކަނޑުގެ ސަރަޙައްދުތައް ބެލެހެއްޓުމަށް ބޭރުގެ އެއްވެސް އަސްކަރީ ފަރާތަކާ ހަވާލުނުކުރުމަކީ މިނިވަންކަމާއި ސިޔާދަތު ހިމާޔަތްކުރުމަށާއި، މި ސަރަޙައްދުގެ ހަމަޖެހުން ދެމެހެއްޓުމަށްޓަކައި ދިވެހި ސަރުކާރުން ގެންގުޅޭ އެންމެ މުހިންމު އަސާސީ ސިޔާސަތުކަމަށާއި، ރާއްޖޭގެ އެއްވެސް ސަރަޙައްދެއް އަސްކަރީގޮތުން ނުވަތަ އެނޫންވެސް ގޮތަކުން ބެލެހެއްޓުމަށް ބޭރުގެ ފަރާތްތަކަށް ހުޅުވާލުމަކީ ޤައުމުގެ ސިޔާދަތަށް އުނިކަން އައިސް، ސަރަޙައްދީ އަމާންކަމަށް ބުރޫއަރައި، ސަރަޙައްދީ ބޮޑެތި ބާރުތަކުގެ ވާދަވެރިކަމުގެ ތެރެއަށް ރާއްޖެ ފިއްތާލެވޭނެ ނުރައްކާތެރި ކަމެއްކަމުގައި ސަރުކާރުގެ ބަޔާނުގައިވެއެވެ.

ރައީސް ނަޝީދުގެ ސިޔާސީ ޙިކުމަތެއް ނެތް، އެއްކޮޅަށް ޖެހިފައިވާ ގޮވާލެއްވުން

ކުރީގެ ރައީސެއްގެ މަޤާމު ފުރައްވާފައިވާ ބޭފުޅަކު، ދިވެހިރާއްޖޭގެ ސަލާމަތީ ބާރުތަކުގެ ޤާބިލުކަމާމެދު ސުވާލު އުފައްދަވައި، ބޭރުގެ އަސްކަރީ ބާރުތަކުން ރާއްޖޭގެ ކަނޑުތައް ބެލެހެއްޓުމަށް ގޮވާލެއްވުމަކީ ޤައުމީ ލަދުވެތިކަމެކެވެ. މިއީ ވަކި ޤައުމެއްގެ ސިޔާސީ އަދި އަސްކަރީ ނުފޫޒު ރާއްޖޭގެ މައްޗަށް ގާއިމުކުރުމަށް މަގުފަހިކޮށްދިނުމަށް، އެއްކޮޅަށް ޖެހިވަޑައިގެން ނަޝީދު ކުރައްވާ ނުރައްކާތެރި ވަކާލާތެކެވެ. ދިވެހިރާއްޖެއަކީ ކުޑަ ޤައުމެއް ކަމުގައި ވީނަމަވެސް، އަމިއްލަ އިޤްތިޞާދީ އަދި ސިޔާސީ ސަރަޙައްދު ބެލެހެއްޓުމުގެ ޤާނޫނީ އަދި އަސްކަރީ ޤާބިލުކަން އެމްއެންޑީއެފްގައި އެބައޮތެވެ.

ސަރުކާރުގެ ބަޔާނުގައި އިލްތިމާސްކުރައްވާފައިވާ ފަދައިން، ރާއްޖޭގެ ސަރަޙައްދު ބެލެހެއްޓުން ބޭރުގެ އެއްވެސް ފަރާތަކަށް ދޫނުކުރާނެ ކަމުގެ ކަށަވަރުކަން ދެމުން، މިފަދަ ކަންކަމަށް މަގުފަހިވާނޭހެން ބޭރުގެ ނުފޫޒުތަކަށް ސީދާކޮށް ނުވަތަ ނުސީދާކޮށް ވިޔަފާރި ނުވަތަ ސިޔާސީ ދަޢުވަތު ނުދިނުމަކީ އެންމެހައި ދިވެހި ސިޔާސީ ވެރިންނާއި ރައްޔިތުންގެ މައްޗަށް އޮތް ޤައުމީ ވާޖިބެކެވެ.

ޖިއޯޕޮލިޓިކްސްގެ ނުރައްކަލާއި ސަރަޙައްދީ ވާދަވެރިކަމުގެ ތެރެއަށް ރާއްޖެ ވެއްޓުން

އިންޑިއާ ކަނޑަކީ މިހާރު ދުނިޔޭގެ އެންމެ ބޮޑެތި ބާރުތަކުން އަމިއްލަ ނުފޫޒު ގާއިމުކުރުމަށްޓަކައި ވާދަވެރިކަން ބޮޑުކުރަމުންދާ ސަރަޙައްދެކެވެ. މިފަދަ ނާޒުކު ދަނޑިވަޅެއްގައި، ރާއްޖޭގެ ސިޔާސީ ލީޑަރަކު ބޭރުގެ ވަކި އަސްކަރިއްޔާއަކަށް ރާއްޖޭގެ ކަނޑުތައް ބެލެހެއްޓުމުގެ ދަޢުވަތު ދިނުމަކީ، ބައިނަލްއަޤްވާމީ ޖިއޯޕޮލިޓިކަލް ހަންގުރާމައިގެ މައިދާނަކަށް ދިވެހިރާއްޖެ ހަދައިދިނުމެކެވެ. ވަކި ޤައުމެއްގެ އަސްކަރީ ބާރު ރާއްޖޭގެ ކަނޑުތަކުގައި ގާއިމުވެއްޖެނަމަ، އެކަމާ އިދިކޮޅު ނުފޫޒުތަކުން ރާއްޖެއަށް ކުރިމަތިކުރާނެ ފިއްތުންތައް މާ ބޮޑުވާނެއެވެ.

ދިވެހިރާއްޖޭގެ ޚާރިޖީ ސިޔާސަތު ބިނާވެފައި އޮންނަންޖެހޭނީ ހުރިހާ ޤައުމަކާއެކު ސުލްޙަވެރިކަމާއި އެކުވެރިކަން ދެމެހެއްޓުމުގެ މައްޗަށެވެ. ނަމަވެސް، އެ އެކުވެރިކަމުގެ ބަދަލުގައި އަމިއްލަ ސިޔާދަތާއި ކަނޑުގެ ސަރަހައްދުތައް ބޭރު ބަޔަކަށް ހަވާލުކުރުމަކީ ދިވެހި ޤައުމުގެ މިނިވަންކަމުގެ މައިބަދަ ބިންދާލުމެވެ. ރައީސް ނަޝީދުގެ ވާހަކަފުޅަކީ މިފަދަ ނުރައްކާތެރި މަގަކަށް ރާއްޖޭގެ ކަންކަން އަނބުރާލުމަށް ކުރެއްވި އަމިއްލަ އެދުމުން ފުރިގެންވާ ގޮވާލެއްވުމެކެވެ.

ދިވެހި ސިފައިންގެ ޤާބިލުކަމާއި ޒަމާނީ އަސްކަރީ ވަސީލަތްތައް

ރައީސް ނަޝީދު ދެއްކެވި ވާހަކަފުޅުގައި، ރާއްޖެއަކީ ކުޑަ ޤައުމެއް ކަމުގައި ވުމުން އަމިއްލައަށް ކަނޑުގެ ސަރަޙައްދު ނުބެލެހެއްޓޭނެ ކަމަށް ދޭހަވާ ގޮތަށް ވާހަކަފުޅު ދެއްކެވި ނަމަވެސް، ޙަޤީޤަތަކީ ދިވެހި ސަރުކާރުން މިހާރު ވަނީ ދިވެހި އަސްކަރިއްޔާގެ ޤާބިލުކަން އިތުރުކުރުމަށްޓަކައި ޒަމާނީ އެއަރ މާޝަލް އަދި ޑްރޯން ނިޒާމުތަކާއި ކޯސްޓްގާޑުގެ އުޅަނދުފަހަރު އިތުރަށް ހަރުދަނާކޮށްފައެވެ. ދިވެހިރާއްޖޭގެ އޭއީޒެޑް 24 ގަޑިއިރު ހުއްޓުމެއްނެތި ބެލެހެއްޓުމުގެ ފުރިހަމަ ޤާބިލުކަން މިހާރު ދިވެހި ސިފައިންގެ ކިބައިގައި އެބައޮތެވެ.

ދިވެހި ސިފައިންގެ ޤާބިލުކަން މިފަދައިން ހުރި އިރު، ބޭރުގެ އަސްކަރިއްޔާތަކުގެ މައްޗަށް ބަރޯސާވާންޖެހޭ ކަމަށް ދިވެހި ސިޔާސީ ފަރާތަކުން ވިދާޅުވުމަކީ ދިވެހި ސިފައިންގެ ޤައުމީ ޚިދުމަތާއި ޤުރުބާނީގެ އަގުވަޒަންނުކުރުމެވެ. ދިވެހި ސިފައިންނަކީ ދިވެހި ފަސްގަނޑާއި ކަނޑުތައް ހިމާޔަތްކުރުމުގައި އަބަދުވެސް ސާބިތުވެ ތިބި ބައެކެވެ. އެހެންކަމުން، ބޭރުގެ އަސްކަރީ އެހީތެރިކަން މައިގަނޑު ސަލާމަތީ ބާރެއްގެ ގޮތުގައި ގާއިމުކުރަން ގޮވާލުމަކީ ދިވެހި އަސްކަރިއްޔާގެ އިޢުތިބާރު ކަނޑުވާލުމަށް ކުރެވޭ އަމަލަކަށް ނޫނީ ނުވާނެއެވެ.

ނަޝީދުގެ މާޒީގެ ނުރައްކާތެރި ވާހަކަފުޅުތަކާއި ބޭރުގެ އަސްކަރީ ނުފޫޒަށް ދައުވަތުދެއްވުން

މިއީ ރައީސް ނަޝީދު ދިވެހިރާއްޖޭގެ ސިޔާދަތީ ބާރުތަކަށް އުނިކަން އަންނާނެ ފަދައިން ބޭރުގެ ބާރުތަކަށް ދައުވަތު ދެއްވި ފުރަތަމަ ފަހަރެއް ނޫނެވެ. މާޒީއަށް ބަލާއިރު، ރާއްޖޭގެ ސިޔާސީ މަސްރަޙު ނުވަތަ ސަރަޙައްދީ ކަންކަން ގޮސްފައިވާ ގޮތުން އިންޑިއާގެ އަސްކަރިއްޔާއިން ރާއްޖެއަށް އައިސް ވަދެގަތުމަށްއެކި މަންސަތަކުގައި އޭނާ ވަނީ ގޮވާލައްވާފައެވެ. ސިޔާސީ އަމިއްލަ އެދުމަށްޓަކައި، އަމިއްލަ ދައުލަތުގެ މިނިވަންކަމާއި ސިފައިންގެ އިޢުތިބާރު ކަނޑުވާލައި، ބޭރުގެ އަސްކަރިއްޔާއެއް ރާއްޖޭގެ ފަސްގަނޑަށް ނުވަތަ ކަނޑުގެ ސަރަޙައްދަށް އަތްގަދަކުރުމަށް ގޮވާލުމަކީ ދިވެހިރާއްޖެ ފަދަ ކުޑަ، އިސްތިރާޖީ ގޮތުން ނާޒުކު ގައުމަކަށް އޮތް ބޮޑު ނުރައްކަލެކެވެ.

ބޭރުގެ އަސްކަރީ އެހީއަށް ދައުވަތުދިނުމުގެ ތާރީޚީ ނުރައްކާ: ލަންކާ އާއި ލެބަނަންގެ އިބްރަތްތެރި ޙާދިސާ

ޤައުމެއްގެ އަމިއްލަ ސިޔާސީ ލީޑަރުން، ބޭރުގެ ބޮޑެތި ބާރުތަކުގެ އަސްކަރީ ނުފޫޒަށް ދައުވަތުދީގެން ކަންކަން ކުރަން އުޅުމުން މުޅި ޤައުމުގެ އިސްތިޤްލާލު ގެއްލިގެންދިޔަ ތާރީޚީ އެތައް މިސާލެއް ދުނިޔޭގެ މާޒީން ފެންނަން އެބައޮތެވެ. އެގޮތުން 1987 ވަނަ އަހަރު ސްރީލަންކާގެ ދާޚިލީ ހަމަނުޖެހުންތަކާގުޅިގެން ސަލާމަތީ ކަންކަން ބެލެހެއްޓުމަށް އިންޑިއާގެ އަސްކަރިއްޔާއަށް ފުރުސަތު ދިނުމުން، އޭގެ ނަތީޖާއަކަށްވީ ލަންކާގެ ފަސްގަނޑުގައި ބޭރުގެ އަސްކަރިއްޔާއަކުން އަމިއްލަ ބާރުތައް ހިންގައި، އެކަން ބޮޑު ލޭއޮއްސުމަކަށް ބަދަލުވެ، އެ ޤައުމުގެ ސިޔާދަތީ ބާރުތައް އަހަރުތަކަކަށް ގެއްލިގެން ދިއުމެވެ.

ހަމައެފަދައިން، ލެބަނަންގެ ދާޚިލީ ކަންކަމުގެ ތެރެއަށް ބޭރުގެ އަސްކަރީ ބާރުތަކަށް ދައުވަތުދީ، ސޫރިޔާ އަދި ބޭރުގެ އެހެން އިއްތިހާދުތަކުން އެ ޤައުމުގެ ސަލާމަތީ ކަންކަމާ ހަވާލުވުމުން، މުޅި ލެބަނަން ބޭރުގެ ބާރުތަކުގެ ވާދަވެރި ހަނގުރާމައިގެ މައިދާނަކަށްވެ، ޤައުމުގެ އަމިއްލަ ސިޔާދަތީ ބާރު މުޅިން ހަލާކުވެގެންދިޔައެވެ. މިފަދަ ތާރީޚީ ޙާދިސާތަކުން އެނގެނީ، ކިތައްމެ ކުޑަ ޤައުމަކަށް ވިއަސް، އަމިއްލަ ޤައުމުގެ ސަލާމަތާއި ކަނޑުތައް ބެލެހެއްޓުން ބޭރުގެ ބާރަކަށް ދޫކޮށްލައިފިނަމަ، އެ ބާރެއް އަނބުރާ ފޮނުވާލުމަކީ އަދި އަމިއްލަ މިނިވަންކަން އަލުން ހޯދުމަކީ ނުހަނު އުނދަގޫ، އަދި ޤައުމު ސުންނާފަތިވެގެންދާފަދަ ކަމެއް ކަމެވެ.

ސިޔާދަތީ މިނިވަންކަން އިސްކުރުން

ދިވެހިރާއްޖޭގެ ޚާރިޖީ ސިޔާސަތާއި ސަރަޙައްދީ ސަލާމަތީ ކަންކަމުގައި އަމިއްލަ ސިޔާސީ މަންފާއަށްވުރެ ޤައުމީ ސިޔާދަތު އިސްކުރަންޖެހެއެވެ. ނަޝީދުގެ އިޙްސާސްތަކެއް ނެތް، ޒިންމާދާރުކަން ކުޑަ ވާހަކަފުޅަށް ސަރުކާރުން ދެއްވި ސަރީޙަ ރައްދަކީ، ދިވެހި ފަސްގަނޑާއި ކަނޑުގެ ސަރަޙައްދުގެ ފުރިހަމަ ބާރު އޮތީ ހަމައެކަނި ދިވެހި ދައުލަތަށްކަން ބައިނަލްއަޤްވާމީ ދުނިޔެއަށް ސާބިތުކޮށްދިން މުހިންމު، ޤައުމީ ނިންމުމެކެވެ.

ދިވެހިރާއްޖޭގެ ކަނޑުތަކުގެ ސިޔާދަތީ އިޚްތިޔާރު ބޭރުގެ އެއްވެސް އަސްކަރިއްޔާއަކަށް ދޫނުކޮށް، އަމިއްލަ ފައިމައްޗަށް ތެދުވެ ތިބުމަކީ ދިވެހި ޤައުމުގެ ކުރިމަގާއި، މިނިވަންކަމާއި، ސިޔާދަތު އަންނަން އޮތް ޖީލުތަކަށް ރައްކާތެރިކަމާއެކު ފޯރުކޮށްދިނުމުގެ މައިބަދައެވެ. ސިޔާސީ ޚިޔާލުފާޅުކުރުމުގެ މިނިވަންކަމުގެ ނަމުގައި ޤައުމުގެ ސިޔާދަތީ ބާރުތައް ދޫކޮށްލަން ދެވޭ ކޮންމެ ދަޢުވަތަކީ ދިވެހި ރައްޔިތުން އެއްގޮތަކަށް ވެސް ބަލައިގަންނާނެ ކަމެއް ނޫނެވެ.