ރާއްޖޭގައި މަސްތުވާތަކެތީގެ ވިޔަފާރިކުރުން ހުއްޓާލަންޖެހޭ ކަމަށާއި، އޮޕަރޭޝަން އަލިމަގާ އެކު ޑްރަގްގެ ވިޔަފާރި ރާއްޖޭގައި ކުރަން ދެން ފުރުސަތު ނުދެއްވާނެ ކަމަށް ހޯމް މިނިސްޓަރު އަލީ އިހްސާން މިދިޔަ އަހަރު ވިދާޅުވިއެވެ. އަދި އެފަދަ ފަރާތްތަކާ ދެކޮޅަށް ރާއްޖޭގައި އެޅެން ހުރި އެންމެ ވަރުގަދަ ފިޔަވަޅުތައް އަޅައި، އެފަދަ ކުށްވެރިންނަށް މި ގައުމުގައި އުޅެން އުނދަގޫ ކުރައްވާނެ ކަމުގެ އިންޒާރުވެސް މިނިސްޓަރު އިހްސާން ދެއްވިއެވެ. ނަމަވެސް އެވިދާޅުވި ފަދަ ލެވެލް އަކަށް މި އޮޕަރޭޝަން ކާމިޔާބުވީ ކަމުގެ ނިޝާންތަކެއް އަދި ނުފެނެއެވެ. އޮޕަރޭޝަން "އަލިމަގު" ގެ ނަމުގައި، ދިވެހި ފުލުހުންގެ 500 އޮފިސަރުން ބައިވެރިވެގެން މުޅި ރާއްޖޭގައި މިދިޔަ އަހަރު ފެށި ހާއްސަ އޮޕަރޭޝަންގެ ޙަބަރެއް މިހާރު ނުވާތާ ދުވަސްކޮޅެއް ވެއްޖެ އެވެ. އޮޕަރޭޝަން އަލިމަގަކީ ރާއްޖެ ހައިޖެކް ކޮށްގެން އުޅޭ ޑްރަގް ގޭންގްތަކަށް ސަރުކާރުން ދިން ވަރުގަދަ އިންޒާރެއްގެ ގޮތުގައި އެއިރު ސިފަވެގެން ދިޔައެވެ. ފުލުހުންގެ ހާއްސަ ޑިޕާޓްމެންޓްތަކާއި އެކި ސަރަހައްދުތަކުގެ ފުލުސް އޮފީސްތައް ވިލަރެސްކޮށްގެން، ޓީމުތަކަކަށް ބަހާލައިގެން ރާއްޖޭގެ އެކި ކަންކޮޅުތަކުގައި ގިނަ އޮޕަރޭޝަން ތަކެއް މިދިޔަ އަހަރު ހިންގިއެވެ.
ރައީސް މައުމޫނުގެ ދިގު 30 އަހަރުގެ ވެރިކަމުގައި، ޑްރަގް ހުއްޓުވަން އަޅާލާންވާ ވަރަށް އަޅާނުލައި ދޫކޮށްލުމުގެ ނަތީޖާއެއްގެ ގޮތުން އިތުރަށް ގޯސްވަމުން ގޮސް، ޑްރަގް މައްސަލަ މިހާރު މިއޮތީ ބައިނަލްއަޤްވާމީ ޑްރަގް ނެޓުވޯކްތަކުން މަސްތުވާތަކެތި ސަޕްލައިކުރާ މައި ހަބަކަށް ދިވެހިރާއްޖެ ހެދުމާ ގާތްވެފައެވެ. މިކަން ހައްލު ކުރެވޭނީ މޫނަކަށް ކަނދުރާއަކަށް ބެލުމެއް ނެތި، ކުރީގެ ހޯމް މިނިސްޓަރު އުމަރު ނަސީރު ވިދާޅުވާ ފަދައިން ސާބިތުކަމާއެކު ޤާނޫނު ތަންފީޒު ކޮށްގެންނެވެ.
މި އޮޕަރޭޝަނަކީ ރައީސް ޑރ. މުހައްމަދު މުއިއްޒުގެ އެންގެވުމަށް، އިންޓެލިޖެންސް މައުލޫމާތަށް ބިނާކޮށް، މުޅި ރާއްޖެ ހިމެނޭގޮތަށް ފަށާފައިވާ އޮޕަރޭޝަނެކެވެ. މިއީ ވަކި ސިޔާސީ ބޭނުމެއް ނެތި، އިހްލާސްތެރިކަމާއެކު، ދިގުދެމިގެންދާ ގޮތެއްގައި އެއްވާނެއްގައި ހިންގޭނެ ޕްރޮގްރާމަކަށް ވެއްޖެނަމަ، މިއީ ޤައުމަށް މިވަގުތު އެންމެ ބޭނުންޖެހިފައިވާ މަސައްކަތެވެ. މި ޤައުމުގައި ވަޒީފާ އަދާކުރާނެ ދިވެހީން މަދުވެ، ޤައުމުގެ އިގްތިސޯދީ މުގޫ ބޭރު މީހުންގެ އަތްމައްޗަށް ގޮސްފައިވަނީ ޑްރަގްގެ ވަބާގައި ޒުވާން ޖީލު ޖެހިފައިވުމުންނެވެ. މިޤައުމުން ކޮންމެ މަހަކު ބޭރުވެގެންދާ އެތައް މިލިއަން ޑޮލަރަކީ ޑްރަގް ގަންނަން ގޭންގްތަކުން ހޭދަކުރާ ބޭރު ފައިސާއެވެ. ޑްރަގް ބޯ މީހުން ރީހެބިލިޓޭޓް ކުރާށާއި، އޭގެ ވިޔަފާރި ކުރާ މީހުން އުމުރަށް ޖަލަށް ލައިގެން ކާންދީ، ނިދާނެ ތަން ދީގެން އުމުރަށް ބަލަހައްޓަން ދައުލަތުގެ ބަޖެޓުން އެތައް މިލިއަން ރުފިޔާއެއް އަހަރަކު ހޭދަކުރަން ޖެހެއެވެ.
އޮޕަރޭޝަން އަލިމަގު ކާމިޔާބު ވެއްޖެނަމަ، ޒުވާން ޖީލު މި ނުބައި ވަބާއިން ސަލާމަތްވެ، ޤައުމަށް ފައިދާހުރި މަސައްކަތްތަކަށް ނުކުމެ، ޤައުމުގެ އުފެއްދުންތެރިކަން އިތުރު ކުރެވޭނެ އެވެ. އަދި އޭގެ ސަބަބުން، ޑްރަގް ގަންނަން ބޭރުވާ ފައިސާ ޤައުމުގައި ހިފެހެއްޓި، އެ ފައިސާ މި ޤައުމުގެ ތަރައްޤީއަށް އިންވެސްޓް ކުރެވި، ޑްރަގްގެ ސަބަބުން އުފެދޭ އިޖުތިމާއީ ބަލިތައް މުޖުތަމައުން ނައްތާލެވި، ޤައުމުގެ އިޖުތިމާއީ، އިގްތިސޯދީ، އަދި ދީނީ ފޭރާން ވަރުގަދަވެގެން ދާނެއެވެ. އޮޕަރޭޝަން އަލިމަގަކީ ކޮންމެހެންވެސް ކުރަން ޖެހިފައިވާ މަސައްކަތެކެވެ. އެއްދުވަހުން ނުވަތަ އެއްމަހުން ފޯރިއަރުވާލާފައި ޖަމަލު ފޮޑިއަށް ގޮސް ހުއްޓޭ ކަމަކަށް ވެގެން ނުވާނެއެވެ. ހޯމް މިނިސްޓަރ އިހްސާން ވިދާޅުވީ ޑްރަގް ވިޔަފާރި ކުރުމުގެ ފުރުސަތު ރާއްޖޭގައި ދެން ނުދެއްވާނެ ކަމަށެވެ. ރައްޔިތުން ތިކަމަށް ސައްތަ އިން ސައްތަ ތާއީދެވެ! އެ ފުރުސަތު ނުދެއްވާށެވެ. އެންމެ ވަރުގަދަ ފިޔަވަޅަކީ މަރުގެ އަދަބު ތަންފީޒު ކުރުމެވެ. އެ ޤައުމަކީ ނަމޫނާއެއް ކަމަށް ރާއްޖެއިން ބަލާ ސިންގަޕޫރުގައިވެސް ޑްރަގް ކޮންޓްރޯލް ކޮށްފައި އެވަނީ މަރުގެ ހުކުމް ތަންފީޒު ކޮށްގެންނެވެ. އެމެރިކާގައި ވެސް އަދި ސައުދީ އަރަބިއާގައި ވެސް މަރުގެ ހުކުމް ތަންފީޒު ކުރެއެވެ. އެހެންކަމުން، ރާއްޖޭގައި މަރުގެ ހުކުމް ތަންފީޒު ކުރަން އުޅޭއިރަށް "އިންސާނީ ހައްޤޭ" ކިޔައިގެން މިޤައުމު ހަލާކުކުރަން އުޅޭ ފަރާތްތަކުގެ ހަޅޭކުގެ އަޑަށް ބެލުމެއްނެތި، ދިވެހި ރައްޔިތުންގެ ހައްޤުގައި ޑްރަގާ ދެކޮޅަށް މަރުގެ ހުކުމް ތަންފީޒު ކުރައްވާށެވެ! އެންމެ ހަރުކަށި ފިޔަވަޅަކީ އެއީއެވެ. ނަމަވެސް އޮޕަރޭޝަން އަލިމަގުގެ ޙަބަރެއް މީހާރު މަދުން ނޫނީ ނުއިވެއެވެ. މަރުގެ ހުކުމް ތަންފީޒު ކުރުމުގެ މަސައްކަތުގެ އަޑެއްވެސް ނީވެއެވެ.
ޑްރަގްގެ ވިޔަފާރި ކުރާ ފަރާތްތަކަށް ރާއްޖޭގައި އުޅެން އުނދަގޫވާ ވަރު ކުރައްވާނެ ކަމަށް ހޯމް މިނިސްޓަރު މިދިޔަ އަހަރު ވަނީ ވިދާޅުވެފައެވެ. އެހެންކަމުން، ޑްރަގްގެ ވިޔަފާރި ކުރުމުގެ ފުރުސަތު މި ޤައުމުގައި އިތުރަށް ދެން ނުދެއްވައި، އެންމެ ހަރުކަށި (މަރުގެ އަދަބުގެ) ފިޔަވަޅު އަޅުއްވައި، މި ޤައުމުގައި ހަމަނޭވާލައިގެން އުޅޭނެ ފުރުސަތު ޑްރަގް ޑީލަރުންނަށް ނުދެއްވާށެވެ. ހޯމް މިނިސްޓަރު އިހްސާނަށް ރައްޔިތުން ސައްތަ އިން ސައްތަ ތާއީދެވެ. މި އޮޕަރޭޝަން ނުނިންމައި ކުރިއަށް ގެންދަވާށެވެ.
މި ވެރިކަމުގެ ދައުރުގެ ބާކީ އޮތް ދެ އަހަރު ދުވަހުގެ ތެރޭގައި "އޮޕަރޭޝަން އަލިމަގު" ކާމިޔާބުކޮށް، ދިވެހި މުޖުތަމައު ހަޤީގަތުގައިވެސް ޑްރަގުން ސަލާމަތް ކުރައްވައިފިނަމަ، ރައީސް މުއިއްޒަށް ދެވަނަ ދައުރެއް ތަބަކަކަށް ލާފައި ދޭންވީއެވެ. އަދި އެކަމުގައި ރައީސްގެ އެޖެންޑާ ތަންފީޒު ކުރައްވާ ހޯމް މިނިސްޓަރު އަލީ އިހްސާނަށް، 2028 ގެ ރަނިންމޭޓު ކަމުގެ ޓިކެޓުވެސް ތަބަކަކަށް ލާފައި ދޭންވީއެވެ.
